ლაბორატორიაში სტუდენტები ყველა შესაძლო სამკურნალო მანიპულაციას ფანტომზე ანუ თოჯინებზე გადიან. ფანტომი მაქსიმალურადაა დაახლოებული ადამინის ყბა-სახის აგებულებასთან, ამდენად სტუდენტები პროფესიული ბორმანქანით ახდენენ კბილების დამუშავებას, მათ მკურნალობას და ბჯენის დადებას, ახდენენ კბილების ამოღებას. 

ფანტომი იმდაგვარადაა მოწყობილი, რომ ანესთეზიის გაკეთების დროს, თუ სწორად კეთდება იგი, შუბლზე ნათურა ინთება, თუ არა – არა. აქვე ხდება პროტეზების მომზადება და ჩასმა. ამ ტრენინგების გავლის შემდეგკლინიკაში მისულ სტუდენტებს მოხსნილი აქვთ ნამდვილ პაციენტთან ურთიერთობის ყოველგვარი ფსიქოლოგიური კომპლექსი, აბსოლუტური სიფხიზლით ატარებენ სამკურნალო მანიპულაციებს და სამკურნალო სქემებსაც მართებულად ადგენენ. ამას ხელს უწყობს თითოეულ საფანტომო მაგიდასთან დამონტაჟებული კომპიუტერი, რომელიც სტუდენტებს საშუალებას აძლევს ნახონ სპეციალური ფილმები რეალური მანიპულაციების ჩატარების შესახებ და ის კუმპიუტერული სასწავლო პროგრამები, რომელიც ქართულ ენაზე დაამუშავა გრიგოლ რობაქიძის სახელობის უნივერსიტეტის სტომატოლოგიურმა ფაკულტეტმა.