პროგრამის ყოველ შემდგომ დონეზე სტუდენტი დაიშვება, ჩვეულებრივ, 60 კრედიტის მოგროვების შემთხვევაში.

 

პროგრამის ყოველ შემდგომ დონეზე სტუდენტის დაშვება შესაძლებელია იმ შემთხვევაშიც, თუ კრედიტების რაოდენობა 60-ს არ აღწევს, მაგრამ არანაკლებია 35-ზე. ასეთ  შემთხვევაში სტუდენტმა შემდგომი დონის მოდულებთან/საგნებთან ერთად პარალელურად, ხელმეორედ, უნდა გაიაროს მოდულები, რომლებშიც ვერ დააგროვა  კრედიტები.

 

მოდულის/ საგნის ხელმეორედ გავლისათვის სტუდენტმა დამატებით უნდა გადაიხადოს 400 ლარი თითოეული მოდულისათვის/საგნისათვის.

 

იმ შემთხვევაში თუ დაუგროვებელი კრედიტების რაოდენობა აჭარბებს 25-ს, სტუდენტი არ დაიშვება შემდგომ დონეზე. მან ხელმეორედ უნდა გაიაროს იმ წლის პროგრამა, რისთვისაც ევალება გადაიხადოს სწავლის საფასური ამ კონკრეტული წლისათვის დადგენილი ოდენობით, წინააღმდეგ შემთხვევაში ამოირიცხება სტუდენტთა სიიდან. იგივე წესი ვრცელდება აკადემიური შვებულებიდან დაბრუნების შემთხვევაში.

 

 

დამოუკიდებლად შესრულებული დავალებების ჩაბარება დაგეგმილ ვადაში აუცილებელია.

 

დავალების მიცემისას პროფესორი კიდევ ერთხელ აზუსტებს ჯგუფის წინაშე ნაშრომის წარდგენის ვადას.

 

ობიექტურ გარემოებათა გამო, შესაძლოა, პროფესორის მიერ დათქმული ვადა არ დაემთხვეს გრაფიკში მითითებულს, ასეთ შემთხვევაში, სტუდენტისათვის, საორიენტაციოდ, პროფესორის მიერ გაცხადებული დრო ითვლება.

 

გრაფიკში კორექტივის შეტანის შესახებ, როგორც წესი, პროფესორმა უნდა აცნობოს დეკანატს.

 

დადგენილი ვადის გასვლის შემდეგ ნაშრომი მიიღება შესაფასებლად, მაგრამ ამ შემთხვევაში შეფასების მაქსიმალურ ზღვრად ჩაითვლება 70 პროცენტი/ქულა, ამასთან თუ ეს ნაშრომი ვადის გასვლის შემდგომი ხუთი სამუშაო დღის ვადაში ბარდება.

 

თუ ნაშრომი მეორე ვადის გასვლის მომდევნო ხუთ სამუშაო დღეში ბარდება, შეფასების მაქსიმალური ზღვარია 55 პროცენტი. მესამე ვადაში ჩაბარებული დავალება არ ფასდება.

 

სტუდენტს შეუძლია მოითხოვოს დავალების ჩაბარების გადავადება თუ ამისთვის არსებობს კვლევასთან დაკავშირებული პრობლემები ან სხვა საპატიო მიზეზები.

 

გადავადების თხოვნით, თუ ეს თხოვნა ეხება ესსეს, სტუდენტი განცხადებით მიმართავს მოდულის ხელმძღვანელს, ხოლო საკურსოს გადავადებისათვის პროგრამის დირექტორს. მხოლოდ მათი დასტურის შემთხვევაში ითვლება გადავადებულად ნაშრომის წარმოდგენის ვადა. ასეთ შემთხვევაში ზემოაღნიშნული შეზღუდვები არ ვრცელდება.

 

სტუდენტმა გადავადების თხოვნის განცხადებით უნდა მიმართოს ადრესატებს დადგენილი ვადის გასვლამდე არაუგვიანეს სამი დღისა. ამ ვადის გასვლის შემდეგ განცხადება არ მიიღება, გარდა იმ შემთხვევებისა, როცა საპატიო მიზეზით გამოწვეული შეფერხება აღნიშნულ სამ დღეს მოიცავს.

 

 

კოლიზიად ჩაითვლება ის სიტუაცია, როდესაც სტუდენტი თვლის, რომ მისი ცოდნა ამა თუ იმ მოდულის კონკრეტული ელემენტის ფარგლებში ობიექტურად არ შეფასდა, ან მიაჩნია, რომ არსებობს ობიექტური ფაქტორები, რომლებმაც განაპირობა მისთვის მიუღებელი შეფასება.

 

წინა აბზაცში აღწერილი მდგომარეობის შემთხვევაში სტუდენტს შეუძლია მიმართოს დასაბუთებული განცხადებით საატესტაციო საბჭოს და მოითხოვოს ნიშნის მომატება ან მოდულის მთლიანად ან რომელიმე ელემენტის გადაბარება.

 

პრეტენზიები მიიღება შეფასების შედეგის გაცნობიდან 3 დღის ვადაში.

 

საბჭოს უფლება აქვს არ დააკმაყოფილოს განმცხადებლის მოთხოვნა ან პირიქით, დამაჯერებლად მიიჩნიოს წარდგენილი არგუმენტები და მიიღოს შემდეგი სახის გადაწყვეტილებები:

ნებისმიერი პრეტენზიის განხილვის დროს საბჭო უპირატესად ითვალისწინებს სტუდენტის ინეტერესებს და სადაო სიტუაციებში იღებს გადაწყვეტილებას მის სასარგებლოდ (მხედველობაში მიიღება მისი საერთო აკადემიური მაჩვენებლები და სხვა ფაქტორები).

 

სტუდენტი უფლებამოსილია მოითხოვოს საბჭოს გადაწყვეტილების გადასინჯვა და განცხადებით მიმართოს აკადემიურ საბჭოს.

 

აკადემიური საბჭო უფლებამოსილია  გააუქმოს ან დაეთანხმოს საატესტაციო  საბჭოს გადაწყვეტილებას და საჭიროების შემთხვევაში დანიშნოს ახალი საგამოცდო კომისია.

 

 

საქართველოს კანონი “უმაღლესი განათლების შესახებ” და ქვეყნის შეერთება ბოლონიის პროცესთან, სტუდენტის მობილობის მაღალი ხარისხის მიღწევის საშუალებას იძლევა. ეს იმას ნიშნავს, რომ სტუდენტს შეუძლია ძირითად პროგრამასთან ერთად გაიაროს მეორე ძირითადი პროგრამაც, ანუ დაეუფლოს ორ სპეციალობას. ასეთ შემთხვევაში კრედიტების თანაფარდობა უნდა შეადგენდეს 50/50-ზე, ხოლო, თუ ძირითადი პროგრამა არ იძლევა მეორე ძირითადი პროგრამის არჩევის საშუალებას, ანუ ერთ-ერთი პროგრამის სრულფასოვანი  განხორციელებისათვის 50 პროცენტზე მეტი კრედიტების დაგროვებაა საჭირო, ასეთი პროგრამა ჩაითვლება როგორც დამატებითი და არა ძირითადი.

 

გარდა ამისა, სტუდენტს შეუძლია აირჩიოს ფაკულტეტის მიერ შეთავაზებული კურსები 40 კრედიტის ფარგლებში. ამავე დროს, შესაძლებელია ამ კრედიტების  გამოყენება მეორე პროგრამისათვის, თუ კრედიტების რაოდენობა არ არის საკმარისი. კრედიტების რაოდენობამ, ბაკალავრის ხარისხის მისაღებად, მთლიანობაში, 240 კრედიტი უნდა შეადგინოს.

 

განსაკუთრებით მობილურმა სტუდენტებმა შესაძლებელია 240 კრედიტზე მეტი მოაგროვონ და გაიარონ ნებისმიერი კურსი უნივერსიტეტის მასშტაბით.  ამას სერიოზული დასაბუთება დასჭირდება, რადგან 240 კრედიტი ოთხ წელიწადში ასახავს სტუდენტის სასწავლო დატვირთვას. ის კვირაში 40 საათს ანუ დღეში 8 საათს მოიცავს. იგულისხმება, რომ მეტი დატვირთვა დაბალეფექტურს ხდის სწავლას.

 

თუ სტუდენტი ჩათვლის, რომ მას ხელეწიფება დამატებითი კრედიტების აღება, იგი დარეგისტრირდება შესაბამის მოდულებზე, ხოლო დასრულების შემდეგ მიიღებს დამადასტურებელ სერთიფიკატს ან აღინიშნება დიპლომის დანართში, რისთვისაც დამატებით უნდა გადაიხადოს სწავლის  საფასური  ადმინისტრაციის მიერ დადგენილი ოდენობით.

 

ორი პროგრამის გავლის წესი არ ვრცელდება სამართალმცოდნეობისა და სტომატოლოგიურ სპეციალობებზე, გამომდინარე მათი სპეციფიკიდან.